Ang duha nasikop sa hot pursuit operation pipila ka oras human nila tulisa ang usa ka pasahero sa PUJ nga magbiyahian ngadto sa Talamban diha sa dalan Imus barangay T.Padilla.
Giila ang duha mao sila si Jeffrey Cardona Valleceran, 26, molupyo sa dalan Sikatuna, Barangay Lorega-San Miguel ning dakbayan ug Sergerfer Rosello Uy, 25, anyos, molupyo sa Sitio Freedom barangay T. Padilla ning dakbayan.
Ang duha positibong gitumbok sa biktimang si Edwin Rivas Yanson kinsa nakuhaan sa iyang bulawang bracelet nga nagkantidad og P12,000 samtang kini luwan sa maong PUJ.
Matud pa sa imbestigasyon sa kapolisan ang mga suspek nagpakaaron-ingnong mga pasahero apan dihang pag-abot sa gikahitaboan daling gitiunan og kutsilyo ang biktima ug mideklarar og hold-ap, sa kabalakang dunay mahitabong dili maayo kaniya iya nalang gihubo ang iyang alahas. Human makuha ang tuyo daling nanganaog ang tulo.
Duna pay usa ka kauban ang mga suspek apan padayon pang gipangita sa kapolisan sanglit dali man kining nakaipsot.
Nakuha gikan kang Valleceran ang resibo sa bracelet ni Yanson nga nagkantidad og P7,000 ug usa ka paketeng may sulod nga gituuhang shabu.