Motor nakadasmag, angkas namatay

Namatay ang usa ka ginang dihang ang motorsiklo nga gidala sa iyang bana kalit lang nga nakadasmag sa tawo nga milabang sa karsada sa miaging gabii sa dalan S. Osmeña sa barangay Gun-ob, siyudad sa Lapu-Lapu.

Ang namatay mao si Maricor Cañete, 30 anyos, nga taga sitio Kawayan, Gun-ob sa maong dakbayan ug backrider kini ni Rio Caballes Canete, 34, iyang bana.

Si Nicanor Patalingjug, 36 anyos, biyudo nga nagpuyo usab sa maong dapit nga nadasmagan sa motorsiklo nalamba sa sementadong karsada ug grabe usab nga naangol nga nadangat sa Opon District Hospital.

Si SPO3 Rogelio Trinidad sa traffic section sa kapolisan sa maong dakbayan nga gikahinabi sa Banat News ang miingon nga kusog nga nagdagan ang motorsiklo nga giluwanan sa magtiayon.

Nagsubay kini sa dalan S. Osmeña nga naggikan sa Poblacion dihang paghidangat sa maong dapit si Patalingjug kalit lang milabang sa karsada hinungdan sa pagkaigo niini sa magtiayon.

Matud pa ni SPO3 Trinidad nga gumikan sa kusog nga impact sa maong pagdasmag ang namatay nga backrider ang nalagpot ug nadakdak sa semento nga karasada.

Dali untang gihatod sa Opon District Hospital ang biktima apan si Dr. Roger Yap sa maong tambalanan nga maoy nag-atiman niini ang mideklarar nga nakabsan gayod kini sa gininhawa.