Botika baligya'g pekeng tambal sirhan

Gihagit ni Mayor Tomas Osmeña ang hepe sa Health Regulations sa Department of Health (DOH-7) Dr. Angelita Salarda paghingalan sa mga drug stores dinhi sa dakbayan nga namaligya og peke, ingon man 'expire' ug wala ma-rehistro nga mga tambal ngadto sa mga kustomer.

Mibahad si Osmeña nga iyang pasirad-an ang operasyon sa maong mga drugstore sa higayon nga mapamatud-an ang maong pasangil.

Gitahasan sa Mayor si Konsehal Cristopher Alix, tsirman sa committee on health, nga maoy mohimo og subsob nga pakisusi kabahin niini aron makakuha og kumpletong detalye sa maong panghitabo ilabi na gyud sa mga ngalan sa maong mga drug store.

Si Alix nga nahinabi sa mga tigbalita mipadayag nga iyang gitakdang pakigtagboan karong buntag ang Cebu Drugstores Association aron pagkonpirmar sa maong migawas nga report.

Gibulgar kining maong impormasyon ni Salarda dihang gipatawag sa sesyon sa hunta probinsyal kagahapong adlawa diin gibutyag niini nga sa 69 ka mga drugstore dinhi sa rehiyon nga namaligya sa maong mga depektoso nga tambal ang 21 niini nahimutang dinhi sa dakbayan.

Gipasalig ni Osmeña ang subsob apan patas nga imbestigasyon ning maong isyo ilabi na ang pakisusi sa maong mga gipamaligya nga depektoso nga tambal. Matud sa mayor dunay ubang mga mi-expire na nga mga tambal ang mapahimuslan gihapon og mapalit na sa barato nga presyo.