Kini gumikan sa hugot nga pagpatuman sa "adopt-a-mountain, adopt-a-mining forest program" nga gipasiugdahan sa mga mining and cement companies sa Central Visayas.
Ang maong programa gipasubay usab sa gimando sa balaud sa mga minahan nga kinahanglang ayuhon ang lugar nga apektado sa dili pa nila kini biyaan human sa operasyon.
Usa na niini ang pagpatanum og kahoy sa maguba nga kabukiran ug ang paghatag og proteksiyon ug serbisyo ngadto sa katawhan.
Gisanglitanan ni Mines and Geo-sciences Bureau 7 Regional Director Roger de Dios ang gihimo sa mga minahan sa Central Visayas.
Dul-an sa usa ka gatus ka ektaryang luna nga apektado sa pagmina sa upat ka dagkung minahan sa rehiyon ang natamnan na og kahoy.
Tag kapin sa 20 ka ektaryang luna ang gipangtamnan og kahoy sa upat ka kompaniya sama sa Philippine Mining Services Corporation sa Pugalo, Alcoy sa lalawigan sa Sugbo sa tuig 1983 hangtud 2005; PMSC sa G. Hernandez, lalawigan sa Bohol sa tuig 1988 hangtud 2005; Solid Earth Development and Taiheiyo Cement Phils., Inc. sa San Fernando, lalawigan sa Sugbo sa tuig 1993 hangtud 2005 ug Apo Cement Corporation sa Tinaan, lungsod sa Naga sa tuig 1997 hangtud 2005.
Gipadayag ni de Dios nga usa sa bintaha nga makuha sa bag-ong balaud sa minahan sa Pilipinas mao ang pagpahibalik sa ka daghan sa kakahoyan sa kabukiran base sa ilang natala.