Ang maong hunahuna gipadayag ni Gullas human masayri nga sa unom ka mga yunit sa lokal nga kagamhanan sa iyang distrito, nag-una ang Talisay City sa kadaghan og kaso bahin sa ilegal nga drugas.
Ang unang distrito gilangkoban sa dakbayan sa Talisay, lungsod sa Minglanilla, Naga, San Fernando, Carcar ug Sibonga.
Ang maong kaugmaran nahimo atol sa usa ka "drug summit" nga gipahigayon didto sa Talisay People's Hall niadtong Biyernes nga gipasiugdahan sa Philippine Drug Enforcement Agency (PDEA-7.)
Kini pinaagi sa pagbuot ni Gullas ug Supt. Vicente Loot, hepe sa Cebu Provincial Police Office (CCPO.)
Nasayran basi sa rekord nga sa tuig 2005, may 31 ka tawo ang nadakpan isip "pusher", samtang 34 ang nadakpang "users" ug 25 ka kaso ang napasaka sa korte kalabot sa ilegal nga drugas.
Gisundan kini sa Carcar nga may 29 ang nadakpan, Naga, 13, San Fernando, 11 ug Minglanilla 4. Ang Sibonga maoy way nadakpan ning maong kaso.
Nasayran usab nga sa Talisay ang barangay Tangke ug Cansojong maoy daghan kaayog kaso sa ilegal nga drugas, Liboron, Poblacion III, ug Valladolidad sa Carcar.
Sa bahin ni PDEA-7 chief Amado Marquez, kini nagkanayon nga ang tanan bantayanan kaayo sa mga otoridad kay dinhi nakita na ang sukdanan kon hain ang mga lugar nga gihawiran sa maong bisyo. Alang kang Atty. Paul Clarence Oaminal nga ang disiplina bahin sa ilegal nga drugas angayang magsukad sa panimalay.