Si Arnel Tancinco, executive officer sa Citom mibutyag nga sa 5,152 ka sakyanan nga na-clamp sa iyang mga sakop, ang 4,021 gi-release usab dayon human ang ilang mga drayber o tag-iya mibayad og P500 nga multa ang mga drayber ug sa pending fines.
Matud ni Tancinco nga dunay 885 nga temporaryo lang nila nga gipa-release apan wala itataw ni Tancinco kun ngano nga napalingkawas man ang maong mga sakyanan. Dunay laing 204 nga gitanggong pa sa Citom kay wala maka-settle ang ilang mga tag-iya.
Kabahin sa pagpatuman sa Anti-Smoke Belching Ordinance, miabot og dul-an sa 10,000 ka sakyanan ang nadakpan nga nagbuga og itom kaayo nga aso.
Daghan sa maong mga sakyanan ang wala makapasar sa smoke test hinungdan nga ang City Hall nakatigum og P681,880 isip testing fee, samtang P1.4 milyon ang nakolekta nga multa.
Sa kampanya batok sa overnight parking daplin sa karsada nga usa ka paglapas sa City Ordinance 1627, miabot og 6,431 ka traffic citation tickets ug 1,192 ka Temporary Operator's Permit ang naisyu samtang kapin sa usa ka libo ka sakyanan ang giguroy sa Citom.
Ang rekord sa Citom nga gisumiter sa buhatan ni Mayor Tomas Osmeña nagpakita nga ang Citom nakakolekta og P47.4 milyones nga multa ug parking fees.
Miabot og P26.2 milyones ang parking fees nga nakolekta sa Citom human nila gihimo na nga tag P15 ang bayad sa parking matag oras.
Nasayran nga mas dako ang nakolekta sa Citom gikan sa parking kay sa pagpatuman sa traffic laws.
Apan ang labing daghan nga nadakpan sa Citom mao ang mga tawo nga nagpataka lang og labang sa karsada nga dili pedestrians lanes.
Matud sa report sa Citom nga miabot og 60,000 ang nadakpan sa anti-jay-walking ordinance, ug 40,080 ra kanila ang nakabayad og multa nga tag P50 samtang ang uban mihimo lang og community services.