Nagdula sa armas nakapusil

Usa ka tawo nga nagdula sa gihuptang armas nga kalibre .38 nakaangol sa gikainom niining lalaki dihang aksidente kining mibuto.

Ang aksidente nahitabo alas 11 pasado ang takna sa miaging gabii didto sa Ibabao Estancia, Mandaue.

Si Renato Toledo, 28 anyos, ulitawo nagpuyo sa maong dapit gidakop sa nagpatrolyang kapolisan sa Presinto 4 sa barangay Casuntingan sa maong siyudad.

Ang napusilan ni Toledo mao si Clemente Caburos, 49 anyos, ulitawo nga silingan usab sa suspetsado sa maong dapit.

Ang kapolisan sa Presinto 4 sa Casuntingan Police Station sa Mandaue City Police Office (MCPO) maong dakbayan nga gipangulohan ni P03 Alberto Quilatorio maoy nakadakop kang Mendoza.

Sa nasayran sa Banat News gikan kang P03 Quilatorio nga nag-inom ang suspetsado ug ang biktima sa panimalay niini dihang gikuha ang tinagoang armas nga maoy nakaingon sa maong aksidente.

Ang biktima nga gidala sa Mandaue City Hospital ang padayon nga giatiman sa mga doktor ug ang suspetsado ang gitanggong karon sa bilanggoan.

Ang kasong physical injuries ug ang kalapasan sa Akta Republic Act 8294 kun ilegal nga paghupot og armas ang kasong ipasaka sa kapolisan batok sa maong dinakpan.