2 container vans gi-hold sa coastguard

Duha ka 40 footer container van nga gidudahang gisudlan sa mga luhong sakyanan ang nadakpan sa joint operation sa mga sakop sa Coast Guard ug National Bureau of Investigation niadtong miaging adlaw.

Si Cebu Coast Guard Commander Manolito Malig-on ug mga sakop niini nga giubanan sa mga sakop sa NBI maoy nagsakmit ug gi-impound kini sa ilang buhatan.

Sila si Malig-on ug mga kauban ang nakahukom sa pagsakmit sa maong mga container van dihang ang broker nga nailhan lang sa ngalan nga Melvin ang napakyas sa paghatag og mga dokumento nga maoy magpakitang legal ang sulod niini.

Ang pipila ka mga sakop sa Coast Guard nga gikahinabi sa Banat News nga nagdumili lang sa pagpaila sa ilang kaugalingon maoy ilang gitug-an nga gikan sa gawas sa nasud ang maong mga container van.

Gikan kining gidiskarga sa overseas nga barko nga M/V Glory ug dad-on unta kini sa PEMCO International sa Lower Pakigne Minglanilla.

Matud pa nila nga ang maong establisamento nga gipanag-iya sa usa ka Korean national nga nagnegosyo og mga sakyanan ang gidudahang nagpalusot og luhong sakyanan nga gikan sa gawas sa nasud.

Hinuon si Cebu Custom Collector Lourdes Mangaoang ang mimando kang Malig-on sa pagtugyan sa maong mga container van ngadto kanila.

Si Malig-on ang gikatakdang motugyan sa maong mga container van karong Lunes nga mao usab ang pagbukas niini nga patambongan usab sa mga sakop sa media.