Mipatay ni dok wa ilhi

Pabiling wala mailhi sa mga awtoridad ang pasyente nga langyaw nga mipusil patay sa usa ka doktora sa dakong tambalanan dinhi sa dakbayan niadtong miaging Huwebes sa hapon.

Ang langyaw misulod sa klinika ni Dra. Jane Lim Chua nga nahimutang sa usa sa dakong tambalanan sa Osmeña Boulevard, ning dakbayan ug gipusil ang doktora sa iyang tiyan ug bukobuko.

Human sa pagpusil sa doktora, nagpusil usab sa kaugalingon ang langyaw.

Base sa inisyal nga pakisusi, ang langyaw nagpangita na kang Chua niadto pang Miyerkules diin nakig-estorya kini sa guwardiya sa ospital tungod kay wala niya maabtui tungod kay nakalakaw na kini.

Nakuha gikan sa langyaw ang usa ka notebook nga adunay mga ngalan, apan walay ngalan nga iya ni Chua. Adunay nakuha nga cellphone apan tulo lamang ka ngalan ang natala niini nga walay iya sa doktora.

Ang kapolisan sa Criminal Intelligence and Investigation Bureau nga gipangulohan ni Supt. Pablo Labra II maoy gitahasan sa pag-imbestigar sa kaso.

Matud ni Labra nga giplano sa langyaw ang pagpatay sa doktora tungod kay wala kini magdala og mga butang nga mailhan ang iyang pagkatawo.

Sumala pa ni Labra nga nakig-alayon na sila sa mga embahada sa nagkalainlaing nasud aron pag-ila sa nasyonalidad sa langyaw'ng mamumuno sa doktora.

Ang Bureau of Immigration mitabang usab sa pag-ila sa langyaw pinaagi sa pagpakatap sa dagway niini pinaagi sa cartographic sketch, samtang ang National Bureau of Investigation makig-alayon sa mga network niini sa laing nasud pag-ila sa langyaw.