Centcom alerto

Gipahimutang karon ubos sa "red alert status" ang Central Command sa Armadong Kusog sa Pilipinas nga nagbase sa barangay Lahug, dakbayan sa Sugbo, gumikan sa isyung kudeta.

Kini agig'g pagtamod sa kamandoan nga nadawat dinhi gikan sa ilang General Headquarters sa Camp Aguinaldo kalabot sa giingong lakang sa mga rebeldeng sundawo paglusad og kagubot aron ilugon ang rinda sa panggobiyerno.

Matud pa ni Lt. Col. Jefferson Omandam, tigpamaba sa Central Command nga bisan bisi sila sa ilang kalihokan sa "search,rescue and retrieval operations" didto sa Guinsaugon, St. Bernard, Southern Leyte, apan gipunting nila ang pagtamod niining "heighthned alert" nga kamanduan.

Alang kanila, ang pagkamabinantayon maoy labing gikinahanglan karon aron dili makalitan ang mga sundawo.

Bisan ang ilang mga sundawo nga tua sa St. Bernard, ilang gipaalerto aron nga dili makalitan kon dunay mobangon nga kagubot sa palibot.

Apan gisiguro ni Omandam nga walay mga sundawo sa Central Command nga misimpatiya sa Magdalo group o kaha Young Officers.