Epekto sa asayte sa Semirara sa Antique gitun-an sa batid

Semirara Island - Gitun-an karon sa mga batid ang mahimong epekto sa milutaw nga asayte sa kadagatan sa Semirara, Antique ngadto sa bakhawan sa maong isla.

Kini samtang padayong gikabo sa mga molupyo sa maong lugar sa pagpanguna sa mga tinugyanan sa Philippine Coast Guard ang maong mga asayte.

Matud pa ni Dr. Rex Sadaba, ang hepe sa University of the Philippines in the Visayas (UPV) Task Force Semirara, nga sa pagkakaron dili pa masayran nila kon unsay epekto niining asayte ngadto sa mga tanom nga bakhaw ug sa mga isda ug kinhason nga naa sa kadagatan.

Alang kang Sadaba, molanat pag mga katuigan ang mga pagpaniid una hisayri sa hingpit ang idulot nga epekto niining asayte diha sa kadagatan sa Semirara.

Ang maong asayte nagikan sa usa ka barge sa National Power Corporation nga nalunod niadtong Disyembre 18, 2005 didto sa kadagatan sa isla sa Semirara.

May 364,120 litros ang maong bunker fuel nga milutaw lutaw karon sa kadagatan sa Semirara.