4 ka karsada himuon paraiso

Ang upat ka nag-una nga karsada dinhi sa dakbayan sa Sugbo himuon nga usa na unya ka paraiso sa mga opisyal sa dakbayan pinaagi sa pagbutang og maanindot nga mga tanom nga mamuwak.

Si City Agriculturist Joelito Baclayon mibutyag nga ang butangan nila og daghang mga tanom nga mamuwak og lainlaing kolor mao ang Juan Luna avenue sa Mabolo, McArthur Boulevard, ang Coastal Highway sa South Reclamation Project ug ang Osmeña Boulevard.

Human giaprobahan ni Mayor Tomas Osmeña ang paggahin og duha ka milyon ka pesos alang sa maong proyekto, si Baclayon misugod na sa paglihok aron mapatuman ang maong proyekto.

Gitumong ang pagpaanindot sa maong upat ka dagkong karsada ug uban pang kadalanan dinhi sa dakbayan sa nagsingabot nga pagpahigayon sa 12th Asean Summit nga anhi himoa sa Sugbo karong Disyembre.

Matud ni Baclayon nga dakong garbo sa mga Sugboanon nga ang Sugbo maoy napilian nga pahigayonan sa international event nga salmutan sa mga pangulo sa 17 ka ASEAN countries.

Si Baclayon miingon nga maghimo sila og tunga sa hektarya nga "nursery" diha sa South Reclamation Project diin anha nila alimaha ang tunga sa milyon ka tanom nga kusog mamuwak ug isulod kini og mga kaang.

Matud ni Baclayon nga ilis-ilison nila ang mga tanum nga ipamutang diha sa mga center-islands sa nahisgutang upat ka major thoughfares aron magpabilin ang iyang kalapyo.

Apan dunay mga opisyal sa City Hall nga nangagpas nga makasugat sila unya og problema niini.

Kini tungod kay sigurado nga kun ang maong mga "flowering plants" mabutang na diha sa karsada, duna g'yoy ubang mga tawo nga dili makapugong ug kini ilang pangawaton.