La Niña mohangtod pa sa Hunyo – PAGASA

Opisyal nang gipasidan-an sa mga tinugyanan sa panahon ang mga molupyo sa tibuok nasud batok sa La Niña nga magpabilin dinhi hangtod sa Hunyo gikan ning buwan sa Pebrero.

Ang pasidaan gipahayag ni Weather Specialist Ernesto R. Verceles sa Philippine Atmospheric Geophysical and Astronomical Services Administration (PAG-ASA Manila) pinaagi sa radyo ug television sa gobiyerno.

Gipasabot ni Verceles ang way puas nga pag-uwan maoy dala sa La Niña ug tibuok nasud nga Pilipinas ang gihulga niini sa pagkakaron.

Hinuon bisan ang Indonesia ug Australya dili usab makalikay niini apan mas sayo silang nangandam didto.

Dinhi sa nasud matud pa ni Verceles, nasaksihan na sa tanan ug sa tibuok kalibotan nga ang unang naigo sa La Niña mao ang Guinsaogon, St. Bernard, Southern Leyte.

Apan dili lamang kining lugara diha sa sidlakang bahin sa nasud kun dili bisan ang ubang mga lugar ilabi na sa mga dapit nga may tag-as nga mga bungtod.

Ang nagtindog nga mga bukid ug mga pangpang ug dagkong bato maoy peligro kaayo karong panahona tungod sa landslide o pagdahili sa yuta.

Apan ang mga patag ug mga lugar nga lupa ug kasapaan dili makalikay sa mga baha ug lunop nga maoy angayang tun-an pag-ayo karon sa mga lider sa kagamhanan, aron malibre ang daghang kinabuhi.

Gipasabot pag-ayo ni Verceles nga ang dapit sa gitawag nga "Eastern Seaboard" nga bahin sa kalibotan maoy mag-atubang sa labing peligro ning panahon sa La Niña, diin mahisakop ang Pilipinas.

Ang La Niña maoy kausaban sa hangin ug kahimtang sa dagat sa Pasipiko diin adto magikan ang mopormang panganod ug dag-om sa kalangitan.

Ang kabugnaw sa dagat sa Pasipiko maoy gatilyo sa kakusog sa uwan sa Pilipinas, Indonesia ug Australya, samtang may ubang bahin sa kalibotan nga mahiagom usab sa hilabihang kainit sa panahon, matud pa ni Verceles.