Mga mananagat nagpalaban ni Soc

Mga mananagat sa Talisay nagpalaban ni Mayor Socrates Fernandez tungod sa mga kauban nila nga nasikop didto sa laing lugar tungod kay nakalapas sa boundary.

Nagtapok kagahapon sa buntag diha sa buhatan ni Fernandez ang 40 ka mananagat sa Tanke nga sakop sa kapunongan nga Mananagat sa Talisay Pamo Association, Inc. (MATAPA) ug sa Pundok sa Gagmay'ng Mananagat sa Sawsawan (PGMS).

Gibutyag sa maong grupo nga ang ilang kauban dakpon kun makapanagat didto sa laing lugar ilabi na didto sa Inabangga Bohol ug gawas nga pabayron sila sa ilang kalapasan kuhaon usab ang ilang mga nakuhang isda.

Apan dili sikopon sa Talisay ang mga mananagat nga makalapas sa boundary sa dakbayan ug ang uban kanila mipahigayon og ilegal nga pangisda sama sa paggamit og parakaya ug liba-liba o gagmay'ng mata nga mga pukot nga hasta ang gagmayng isda malakip sa pagkakuha.

Matud sa grupo nga usahay wala silay makuhang isda sulod sa boundary sa Talisay hinungdan nga moadto sila sa laing lugar ug mao usab ang buhaton sa mga dili Talisaynon kun dili makakuha og isda didto sa ilang lugar diha modagan sa lawod sa dakbayan.

Ang nahisgutang grupo miawhag ni Fernandez nga pahugtan sa dakbayan ang paggukod sa ilegal nga pangisda sa lugar ug mihangyo usab sila nga hatagan sila og referral sa mayor nga makalukat og permit sa kagamhanan sa lungsod sa Inabangga aron tugotan silang makapangisda sa nahisgutang lugar.

Si Fernandez mibutyag nga miluwat na siya og kamanduan sa Fishermen Sea Ecological Care (FISECA) grupo nga nagbantay sa kadagatan sa dakbayan nga hugtan ang pagbantay sa ilegal nga pagpangisda apan mismo ang mananagat sa lugar mireklamo tungod kay nagpahigayon usab sila og pagbantay sa ilegal nga panagat sama sa liba-liba.

Si Fernandez miawhag sa grupo sa mga mananagat nga mogama og resolusyon ang ilang pundok aron ipadala ngadto sa kagamhanan sa Inabangga.

Ang mga Talisaynong mananagat mibutyag kagahapon sa ilang planong pagduso sa ilang reklamo diha sa buhatan sa board member ug gusto usab nila nga makigdayalogo sa grupo sa mga mananagat sa laing lugar aron masulbad ang nahisgutang problema.