Bongga nga charter gipakanselar ni Margot

Mihangyo si First Lady Margot Osmeña nga dili na lang ihinayon ang planong bongga nga selebrasyon sa ika-69 ka tuig nga charter day sa dakbayan sa Sugbo sa Pebrero petsa 24, adlaw'ng Biyernes.

Gibutyag ni Mayor Tomas Osmeña atol sa press conference kagahapon nga tumong sa maong paghangyo ni Margot sa dili paghinayon sa maong bongga nga kalihukan gumikan sa nahitabung trahedya didto sa Guinsaugon, St. Bernard Southern Leyte.

Apan gibutyag sa mayor nga iyang gipasabot ang iyang asawa nga obligasyon kining maong kalihukan sa siyudad nga dili mahimong kanselahon gumikan kay tipik ug kabahin kini sa mga pagpangandam nga himuon sa dakbayan sa gitakda niining pag-host sa 12th Asean Summit karong Disyembre.

Alang sa mayor nga kun wala pa ang maong international nga kalihukan mahimo ra unta nga dili lang usa ipahigayon ang maong bongga nga silibrasyon sa charter day karung tuiga ug ingon man dili usab unta mopagawas og dako -dako nga gahin ang dakbayan.