Evac site nausab kay yuta sigeng naglihok

Saint Bernard, Southern Leyte - Namatikdan kagahapon sa pagsugod palang sa operasyon sa pagpangita sa mga biktima sa barangay Guinsaogon, Saint Bernard, Southern Leyte nga nausab ang dagway sa site, kini human giingong misibog nasad ang yuta gumikan sa pagpunay og ulan sa milabay'ng gabii.

Matud pa ni Gobernador Rosette Lerias sa pakighinabi sa Banat News kagahapon nga gitawgan siya ni Lt. Teodulo "Ted" Esguerra ang flight surgeon sa Philippine Coast Guard kinsa maoy usa sa mga nagkuging mag-inspection sa site matag unya nga dunay mga punoan sa kahoy nga wala dinha niadtong milabay'ng Domingo nga nabutang na karon ug dunay mga bato nga daan nang diha sa samang adlaw nga wala na diha kagahapon.

Giingong ang maong lugar susama gihapon sa sitwasyon sa unang adlaw diin kanunayng maglihok ang yuta ug nakaingon nga magpunay og kabalda ang operasyon gumikan usab sa peligrong nagpaabot sa mga rescuers. Pipila sa mga rescuers ang gipabalik sa command post gawas lang sa mga sakop sa Philippine Army inabagan sa mga sakop sa US Marines nga nagbutang og tulay diha sa Lawigan River ug naghimo og bag-ong kalsada nga direkta pangadto sa site.

Si Esguerra sa pakighinabi sa Banat News sa milabay'ng gabii nagkanayon nga nagkagamay ang pag-asa sa mga tawong natanggong sa ilawom kung buhi man gumikan niining pagpunay og bunok sa ulan, matud pa niya nga maghinay-hinay og sirado ang gagmayng bangag sa yuta nga posibleng mao ray nagsuplay og hangin sa mga natanggong sa ilawom.

Si Esguerra kinsa usa ka propesyunal nga mountaineer ug rehistradong doctor mipasabot nga ang usa ka tawo mahimong mabuhi nga walay hangin sulod lang sa upat ngadto sa pito ka minutos ug magdepende usab sa gilapdon sa lugar diin kini mapiit, kung dako mas taas og tsansa apan kun piot kaayo hayan mahutdan kini og hangin ug mamatay kung dili makuha sa mga rescuers una pa kini mahitabo.

Giesplikar usab sa maong opisyal nga dako kaayo og kalainan ang landslide sa nahagsa nga building, matud pa niya nga ang landslide gamay kaayo ang tsansa nga dunay mahibiling lugar nga dili matabunan ilabi na kung susama sa nahitabo sa Guinsaogon nga sagol tubig ang yutang mihan-ok sa barangay samtang sa usa ka mihagsang building dunay posibilidad nga mapugngan pa sa mga bungbong ug mga haligi nga madugmok ang kinatibuk-an hinungdan nga dunay maagiang hangin alang sa mga matanggong sa ilawom.

Gipaninguha karon sa mga rescuers nga mabutangan og kalsada gikan sa gibutang nga tulay pangadto sa mismong site aron mapadali ang operasyon sanglit niadtong wala pa ang tulay magbalik-balik og kabyon sa mga nagpaabot nga payloader ang mga tawo aron lang makatabok sa gibana-banang 100 ka metros nga gilapdon sa maong suba.

Kagahapon si Mayor Maria Lim sa pakighinabi sa Banat News nagkanayon nga ila nang gisugdan ang ikaduhang hugna sa operasyon, kini mao ang pagpangita na og lugar nga kabalhinan sa mga survivors, matud pa niya nga iyang gipiliang balhinan karon mao ang Barangay Tambis Uno ug Sitio Kalintian sa barangay Gimbangan, kini kun matapos dayon ang survey sa Mines and Geoscience Bureau nga maoy mosusi kun luwas ba ang lugar nga puy-an.