Naghikog sa atubangan sa iyang uyab

Usa ka tawo nga nakainom og ilimnong makahubog naghikog atubangan sa iyang hinigugma sa sulod sa tindahan niining gitrabahoan.

Ang paghikog nahitabo alas 6 pasado ang takna sa dalan S. Osmeña, Poblacion sa dakbayan sa Lapu-Lapu.

Ang biktima mao si Paul Cugay, 23 anyos, ulitawo, nga taga Balamban ug temporaryong nagpuyo sa Pajo, siyudad sa Lapu-Lapu.

Si SPO2 Nicanor Bacayo sa kapolisan sa maong dakbayan nga gikahinabi sa Banat News miingon nga namisita sa gitrabahoang tindahan ang biktima nga nahimutang sa maong dapit.

Didto sa sulod sa gitrabahoang tindahan ang hinigugma niini nga usa ka Joy Sumalinog ug kalit lamang niining gisulod nga maoy hinungdan sa panaglalis.

Ang biktima nga gibati og kapungot sa mao nilang panaglalis kalit nga mipunit sa gi-display nga kutsilyo ug giunay pagdunggab ang iyang tiyan.

Ang biktima nga gitabang sa mga higala dali nga gihatod sa Opon District hospital ug padayon kining giatiman sa mga doktor.