Matud pa ni Petilla nga sama sa makita pinaagi sa "footage" sa mga television, ang kabungtoran sa Southern Leyte ilabi na didto sa lungsod sa St. Bernard, labong kaayo ang kakahoyan.
Giangkon ni Petilla nga may mga bahin sa ilang mga bungtod nga may pagka-opaw, apan agi kini sa dinahili usab sa yuta sa milabay nga katuigan.
Apan bahin sa isyu nga "illegal logging," si Petilla mipasalig nga wala kini mauso didto sa Leyte.
Ang lalawigan sa Leyte ug Southern Leyte, managlahi, ug ang gobernador sa Southern Leyte mao si Rosette Lerias.
Matud pa ni Petilla nga mas dako ang Leyte kay gilangkoban kini sa lima ka mga distrito kongresyonal samtang ang Southern Leyte usa ra ka regional district.
Apan daghan kaayong nadawat si Petilla nga mga tanyag nga hinabang gikan sa gawas ug mao kini iyang gipatakli dayon ngadto kang gobernador Lerias sanglit ila ang katungod sa pagdawat niini.
Apan giangkon ni Petilla nga ang Leyte ug Southern Leyte pareho ra og mga nahimutangan sa yuta sa kabungtoran nga pulos peligro sa mga pagdahili sa yuta sa panahong magkusog ang uwan, tungod kay ang mga ilawom sa kabungtoran ning maong mga lalawigan pulos "geothermal" o volcanic nga maoy hinungdan nga haguka kaayo og dali kaayong matay-og sa mga natural nga katalagman.