Polis mipusil sa bayaw misurender

Boluntaryong mitahan sa iyang kaugalingon sa kapolisan sa lungsod sa Carcar ang usa ka polis nga nadestino sa Regional Mobile Group (RMG) sa Sibonga kinsa miunay og pusil sa iyang bayaw niadtong Sabado sa udto diha sa Barangay Poblacion, Carcar.

Ang suspetsado mao si PO1 Joseph Dagatan residente sa Barangay Bolinawan, Carcar.

Nakaangkon og samad pinusilan sa walang tiil si Mario Rey Renijane ug dali kining gidala diha sa Carcar District Hospital.

Base sa imbestigasyon sa kapolisan sa Carcar, si Dagatan ug Renijane dunay personal nga gikabangian.

Gidunggab ni Renijane si Dagatan gamit ang philip screw hinungdan nga gipusil siya sa maong polis gamit ang iyang M16 armalite.

Gitahan usab ni Dagatan ang iyang M16 armalite lakip na ang usa ka magazine sa bala niini nga dunay 19 ka buhing bala ug usa ka kabhang.

Ang kapolisan sa Carcar nag-follow-up sa maong insidente.