Mga konsehal sa Talisay namali na ngadto ni Leyson

Bisan mo-usa ka tuig pa kapin sa dili pa ang piniliay sa tuig 2007 apan daghan na sa mga konsehal sa dakbayan sa Talisay nga kaalyado sa administrasyon ni Mayor Socrates Fernandez ang hinay hinay nga mibali ngadto sa kampo ni Konsehal Gabriel Leyson nga sibaw na kaayo karun nga mipadayag sa iyang interes nga magpapili pagka mayor sa nahisgutang siyudad.

Gibutyag ni Leyson dihang nahinabi sa mga tigbalita nga pagkakaron mipaklaro na sa ilang baruganan ang pipila ka mga Konsehal sa maong syudad nga mosuporta sa iyang kandidatura ug kini gilangkoban nila ni Konsehal Emil Go, Allan Bucao og Inaque Jordana.

Gawas niini gibutyag sa konsehal nga pipila ka bulan gikan karon duna pa gyuy laing tulo ka mga konsehal nga kaalyado sa administrasyon ang nagpadala na og filler ngadto sa iyang kampo ug nagpahibalo nga moabin ngadto sa iyang pundok.

Nagdumili lang una pagtug-an si Leyson sa mga pangalan ning maong mga konsehal aron paglikay nga dili ma-impluwensya ang ipakanaog unya nilang hukom.

Gawas niini gibutyag sab niya nga duna nay pipila ka mga kapitan sa kabarangayan mipadayag na usab og suporta sa umaabot niyang kandidatura sa maong siyudad.

Giangkon ni Leyson nga determinado gyud siya nga mobalik sa iyang orihinal nga lugar ang siyudad sa Talisay gumikan kay tuyo niya nga makaserbisyo sa mga taga- Talisaynon.

Ang pamilyang Velez sa Talisay maoy kadugo ni Leyson nga kaliwat sa iyang inahan ug nangangkon usab ang konsehal nga paryente sila ni Kongresista Eduardo Gullas nga maoy nagdumala karon sa maong distrito.

Gani si Leyson lig-on na sa iyang baruganan nga magpabalhin sa iyang pagpa-rehistro og pinuy-anan gikan sa dakbayan sa Sugbo ngadto na sa Lagtang,Talisay karong Abril aron mahunong na ang mga intriga kaniya sa giingong dili kini molupyo sa Talisay.