Policewoman 'napusilan' patay sa laing polis

Patay ang usa ka policewoman human giingong aksidenteng napusilan sa laing polis diha mismo sulod sa kampo sa Cebu City Police Office kagahapon sa hapon.

Ang namatay giilang si SPO4 Grace Remata Retuya, hingkod ang panuigon nadestino isip Police Non-Commission Officer diha sa buhatan sa Administration sa Cebu City Police Office. Ang polis nga si PO3 Rogelio Castañeda nga nadestino sa San Nicolas Police Station maoy aksidenteng nakaigo kaniya.

Sumala pa sa imbestigasyon ni SPO3 Zenaido Pastorfide ang biktima naglingkod sa Admin Office dihang kalit nga mipaka ang usa ka buto sa armas ug nadungog nalang si Retuya nga misinggit og "Agay tabangi ko."

Nianang pagkahitabo giingong diha si PO2 Mark Eduard Barrios maoy katabi ni Castañeda.

Si Castañeda daling miagak kang Retuya ngadto sa Perpetual Soccour Hospital apan dangtan og usa ka oras nakabsan kini sa kinabuhi.

Mitahan dayon si Castañeda sa buhatan sa Homicide Section human sa hitabo ug gipailawom sa paraffin test, samtang ang kalibre 45 pistola niini gi-turn-over ngadto sa Homicide Section diin duna pay 12 ka buhing bala nga nahibilin.

Nasuta nga si Castañeda nagbarog tulo ka metros ang gilay-on gikan sa Admin Office dihang iyang giingong gisusi ni Castañeda ang armas apan kalit kining mibuto ug adto napunta sa walang bahin sa lawas ni Retuya human molapos diha sa bungbong.

Matud pa ni Inspector Mario Monilar ang hepe sa Homicide Section nga aksidente ra gyud ang hitabo.

Si Castañeda nasakop sa level 5 sa firing efficiency, sa 401 ka shooters ika 332 siya sa maong ranking asoy pang CCPO firing range staff Yogi Ruiz.