Taxi gitulis

Ang mga sakop sa Theft and Robbery Section sa kapolisan sa dakbayan sa Lapu-Lapu ang padayon karon sa ilang pakisusi sa pag-ila sa tulo ka armadong mga tawo nga mitulis sa drayber sa taksi sa miaging gabii.

Ang biktima mao si Larry Manaytay, 31 anyos, minyo nga taga Basak, siyudad sa Mandaue ug drayber sa EE taxi nga nagdala sa plate number GUF 330.

Si PO2 Elmer Canillo nga gikahinabi sa Banat News nagkanayon nga ang tibuok adlaw nga kinitaan niini nga mokabat sa P1,800 nadala sa mga tulisan.

Matud pa ni PO2 Canillo nga ang biktima miasoy kanila nga ang tulo ka wala hiilhing lalaki ang misakay niini sa dalan Maximo Patalingjug Avenue sa barangay Pajo sa maong siyudad.

Nagpahatod kini sa sitio Abuno sa barangay Pajac apan sa pagsubay sa sudlonon nga lugar ang usa sa mga pasahero nga naglingkod sa luyo ang kalit lang mition og armas ug mipahibalong tulis.

Dugang pa ni PO2 Canillo nga ang pasahero nga tupad sa biktima maoy nagkuha sa pitaka nga maoy gisudlan sa salapi nga kinitaan niini.