Magtiayong pusher 'sikop

Nadakpan na sa kapolisan sa lungsod sa Balamban ang magtiayon nga giilang number 5 ug 6 nga target drug personalities sa maong lugar atol sa buy bust operation kagahapon sa sayo sa buntag.

Ang nadakpan mao sila si Johnny ug Evelyn Rojas, pareho nga 44 anyos nga magtiayon nga taga sityo Lacdon, Aliwanay, lungsod sa Balamban.

Sila si Police Chief Insp. Anthony Bagarinao ug kaubanang polis inabagan sa mga civilian volunteers ang nipahigayon og ronda sa panimaye sa magtiayong Rojas.

Nasakmit gikan sa magtiayun mao ang 31 ka deck sa gagmay'ng paketeng shabu ug kwarta nga gitouhang halin sa ilegal nga drugas balor og P1,315.

Usa ka Wendell Bitoon, 42 anyos, nga taga Lamesa, lungsod sa Balamban ang lakip sa gidakop sanglit diha kini sulod sa panimaye sa magtiayun atol sa ronda.

Ang mga dinakpan gibalhog na sa Balamban municipal jail samtang kasong pagpayuhot sa ilegal nga drugas ang gipasaka na ngadto sa korte.

Ang ronda gipasikad sa search warrant nga giluwatan ni Judge Cesar Estrera ug gisaksihan kini nilang Aliwanay barangay kapitan Orlando Tijap kinsa mao usab ang presidenti sa Liga ng mga Barangay sa lungsod sa Balamban inubanan sa hepe sa iyang barangay tanod nga si Cesar dela Fuente.