Leyson mobalhin na'g rehistro sa Talisay

Karon nang bulan sa Abril o ba kaha unya sa bulan sa Mayo karung tuiga himuon na ni konsehal Gabriel Leyson ang pagpabalhin sa iyang rehistro gikan dinhi sa dakbayan sa Sugbo ngadto na unya sa siyudad sa Talisay.

Gibutyag ni Leyson dihang nahinabi sa mga tigbalita kagahapon sa buntag nga kini tungod sa iyang desisyon nga magpapili pagka mayor sa siyudad sa Talisay atbang kang Mayor Socrates Fernandez .

Gibutyag usab ni Leyson ang iyang residensiya diha sa Lagtang Talisay maoy iyang iparehistro aron mamahimong legal ang iyang pagpapili pagka mayor sa maong dakbayan.

Iya usab nga giklaro sa mga tigbalita nga personal niyang desisyon ug walay nagmando kaniya nga magpapili sa maong posisyon sukwahi sa nahaunang mga tsismis nga gisugo kini og palansar ni Mayor Tomas Osmeña aron moatbang kang Fernandez tungod sa bangi niini sa portion sa South Reclamation Project (SRP).

Giklaro ni Leyson niadtong liwas pa sa martial law nag-plano na siya nga molansar pagka mayor sa maong siyudad diin lumad siya nga molupyo, apan wala kini mahinayon.