2 fetus nakit-an

Duha ka mga fetus ang napalgang gipanglabay sa walay mga puangod nga inahan gikan sa dakbayan sa Danao ug dakbayan sa Sugbo niadtong milabay'ng Miyerkules.

Usa ka Racquel Pagdalian, 28, molupyo sa dalan B. Rodriguez, Riverside barangay Sambag 2 ning dakbayan ang nakapunit og shopping bag nga may sulod nga karton niadtong nakalabay'ng gabii.

Matud pa ni PO2 Henry Orbiso sa Homicide Section sa pakighinabi sa Banat News nga gipunit ni Pagdalian ang bag ug dihang gihiling bata ang sulod nga dili pa matino ang kinatawo niini.

Nagduda ang kapolisan nga posibleng gilabay ra sa inahan ang biktima.

Samtang sa laing bahin laing fetus ang napalgan sa mga nanagduwang bata sa usa ka abandonadong iceplant sa Barangay Look dakbayan sa Danao sayo niadtong milabay'ng adlaw.

Matud pa ni SPO3 Edgar Gomez sa pakighinabi sa Banat News nga ang maong bata gisulod sa usa ka garapon nga giputos og kolor yellow nga plastic ug gilubong diha sa maong compound.

Ang inahan sa mga bata nga si Flosie Rosales mitug-an sa grupo nila ni SPO1 Allan Muñoz nga pipila na ka adlaw ang nakalabay duna siya'y nakit-ang upat ka tawo ang nanulod sa maong compound nga nagdala og mga flashlight, wala lang niya kini panumbalinga sa pagtuong mga kawani sa iceplant ang maong mga tawo.

Ang mga bata na maoy mipahibalo sa gwardiyang si Emerlito Bestudio kabahin sa ilang nakit-an, usa kini ka lalaki nga gibanabanang upat ngadto sa lima na ka buwan.

Gisusi na karon sa kapolisan ang pag-ila sa mga inahan sa mga fetus nga miunay og patay kanila ug wala gani mopahimutang kanila sa maayong lubong.