Akrho namusil sa Compostela

Gidudahang mga sakop sa Alpha Kappa Rho (Akrho) ang namusil sa duha ka mga batan-ong lalaki nga naglakaw daplin sa karsada didto sa Barangay Estaca, lungsod sa Compostela lalawigan sa Sugbo kagahapon sa kaadlawon.

Ang mga biktima sa pagpamusil giila ni PO2 Pedro Borinaga sa Compostela Police Station nga mao sila si Ronald Mahinay, 20-anyos, ulitawo taga Barangay Panyaw sakop sa lungsod sa Compostela ug si Doncar Ceniza, 18-anyos, ulitawo, nagpuyo sa Barangay Copcop, lungsod sa Liloan Cebu.

Ang mga biktima nga miasoy ngadto ni PO2 Borinaga nagkanayon nga naglakaw sila sa maong dapit sa dihang tulo ka wala mailhing mga tawo nga luwan sa usa ka XRM nga motorsiklo ang ilang gikasugat. Usa sa tulo ka mga sakay niini misinyas pinaagi sa iyang kamot sa sign sa Akrho pagkahuman mikalit lang kini og pamusil.

Si Mahinay nakaangkon og tulo ka mga samad pinusilan sa iyang lawas samtang si Ceniza sa iyang ulo hinungdan nga gidali sila pagdala sa Vicente Sotto Memorial Medical Center.

Lima ka kabhang sa bala sa kalibre .45 nga pistola ang nakit-an sa kapolisan sa lugar nga nahitaboan.