30 ka pusher gikiha

Mokabat na sa 30 ka tawo nga pusher ug shabu sa dakbayan sa Mandaue ang mga nadakpan ug gipasakaan og kaso sa bulan lang sa Enero niining tuiga.

Si Supt. Paquito Belandres nga maoy deputy chief for administration sa kapolisan sa Mandaue maoy mipahibalo niini kang Mayor Thadeo Ouano.

Matud pa ni Belandres nga ang pagkasikop sa maong mga tawo nga nagpayuhot og shabu maoy resulta sa ilang paghingusog sa kampanya sa pagsumpo niini.

Ang Total Eradication of Drug Dependency (TEDD) Board sa siyudad sa Mandaue mikompirmar sa report ni Belandres.

Si Roberto Juanico sakop sa TEDD board miingon nga gawas nga gihingusgan sa kapolisan ang kampanya sa pagsikop sa mga gikatahapang nalambigit sa druga padayon silang nagpahimangno sa mga lumolupyo sa kabarangayan sa dautang epekto niini.