Ang biktima giila ni SPO2 Juan Cardona Jr., sakop sa Alegria police station nga mao si Joseph Guisadio Lauron, 23 anyos, minyo, nagpuyo sa sitio Sangi sa Brgy. Madridejos, samtang ang suspetsado nga uyoan ra usab sa biktima mao si Ramon Guisadio, 47 anyos, minyo, nanimuyo sa Sitio Alangasil sa samang barangay ug empleyado sa Ceres Bus co.
Ang biktima ug ang suspetsado nakig-inom og ilimnong makahubog usab sa ilang mga higala, ug nahisgutan ang daan na nilang panagbingkil nga maoy motibo sa maong krimen.
Ang suspetsado mikalit lang og kuha sa lansang nga tayaon ug midunggab sa tiyan sa biktima ug dayong dagan pahilayo sa maong dapit. Apan sa gihimong follow-up operation sa kapolisan nasikop ra usab dayon ang suspetsado nga didto sa sulod sa iyang balay nagtago.
Ang uban nga gikainom sa biktima daling midala kaniya ngadto sa Badian District Hospital aron mapatambalan ang samad sa iyang tiyan, apan gibalhin kini sa Vicente Sotto Memorial Medical Center (VSMMC) dinhi sa dakbayan sa Sugbo.
Ang kapolisan sa lungsod sa Alegria nagpaabot na lang sa mga kabanay sa biktima nga mopasaka og tukmang sumbong sa hukmanan batok sa suspetsado nga nagtingkagol na karon sa bilanggoan.