Tau nga nanul-it og pusil wanted

Gipangita karon sa kapolisan ang lain na usab sakop sa Tau Gamma Phi fraternity human niini dul-iti og pusil ang ulo sa usa ka istambay diha sa Sitio Villagonzalo 2, barangay Tejero ning dakbayan niadtong Domingo sa hapon.

Ang gipangita karon mao si Rodney Cabahug, 21, molupyo sa maong dapit ug giingong sakop sa Tau Gamma Phi kinsa giingong 'maldituhon' sa maong lugar sumala pa sa kapolisan.

Apan ang bala gituohang igo rang niungot sa unod sa tuong bahin sa ulo ug wala makasulod sa bagol-bagol sa biktimang si Albert Pibede, 26, molupyo sa nahisgutang lugar.

Wala usab mobutyag ang biktima kun sakop ba siya sa karibal nga fraternity sa Tau Gamma nga Akrho ug kun unsay motibo sa pagpamusil kaniya.

Si PO3 Rogelio Nedamo sa pakighinabi sa Banat News mitug-an nga kasamtangang nagbarog-barog ang biktima diha atubangan sa balay sa iyang iyaan daplin sa dalan dihang kalit nga giduol sa suspek kinsa armado og wala matinong kalibre sa armas dayong dul-it og pusil sa iyang ulo makausa ka higayon.

Bisan nabungog sa igo diha sa ulo nakadagan pa pasulod sa balay sa iyang iyaan si Pibede samtang daling miikyas ang suspek.

Matud pa ni Nedamo nga idlas kaayong nakasulod sa suot-suot nga kabalayan ang suspek dihang miresponde ang mga sakop sa Special Weapons And Tactics (SWAT) ug ubang mga polis.

Ning bag-uhay lang mibutang og patong sa ulo sa matag wanted nga fratman si Mayor Tomas Osmeña nga mibunga usab og maayo gumikan sa pagtahan sa duha ka sakop nga Tau Gamma nga sila si Glenn Codiñera ug Warren Entera ug pagkasikop usab sa duha pa ka sakop sa Alpha Kappa Rho usa kanila si Sonny dela Cruz ang number 4 most wanted sa dakbayan ug giingong hitman sa Akrho nga dunay nagpatong-patong nga kaso diha sa Homicide Section.