2 ka tulisan nga rapist gihukman i-lethal injection

Gisentensyahan sa Regional Trial Court ang duha ka mga notoryos nga tulisan nga mamatay pinaagi sa lethal injection human sila mapamatud-ing sad-an sa pagpanulis ug paglugos sa usa ka serbidora upat na ka tuig ang nakalabay.

Nakit-ang sad-an sa gitawag og 'complex crime of rape with robbery' ni RTC Judge Olegario Sarmiento Jr. sila si Ronald Gabuya ug Ryanneal Giron sa pagtulis ug paglugos sa kawani sa Ice Castle.

Base sa rekord, ang biktima (ngalan gipugngan) padulong na pauli diha sa dalan Vicitacion Sambag 2 niadtong tungang gabii sa Marso 18, 2002 gisundan siya sa duha gikan pa sa dalan Osmeña. Matud pa sa gisaysay sa biktima nga nakaila na siya sa dagway sa mga suspek gumikan kay matag gabii sa iyang pagpauli kanunay na niyang makit-an ang duha diha sa atbang sa CAP building sa naasoy'ng dalan.

Pag-abot sa dalan Visitacion si Gabuya kalit nga mition kaniya og kutsilyo ug mipahibalong tulis samtang gipugngan sa usa niini ka kamot ang iyang abaga, gihulga siyang patyon kung mosinggit.

Dihang wala na siya motingog giguroy siya sa duha ngadto sa usa ka bakanteng lote kinse ka metros gikan sa kalsada ug gikuha ang iyang relo, calculator, mga ID ug uban pa dayon gilugos ni Giron. Dihang si Gabuya na wala kini katiwas gumikan sa pag-abot sa usa ka babaye.

Ang maong babaye na maoy midala sa biktima ngadto sa Fuente Police Station diin sila si PO2 Albert Makinano maoy mihimo sa hot-pursuit operation nga miresulta sa pagkasikop sa duha diha sa sudlonong bahin sa Barangay Sambag 2 pagkaadlawon.

Narekober gikan sa duha ang mga gamit sa biktima ingon man ang nahibilin nga kwarta niini. Apan sila si Gabuya ug Giron kusganong mihimakak sa pasangil, matud pa nila nga gi-torture sila sa kapolisan ug gipaangkon sa maong salaod.

Dugang pa nila nga wala sila masikop sa hot-pursuit operation kay si Gabuya nangangkon gipik-ap lang siya sa polis aron pangutan-on kabahin sa pagpanulis ug paglugos sa usa ka babaye.

Samtang si Giron nangangkon nga mitahan siya sa iyang kaugalingon subay usab sa awhag sa usa ka konsehal sa barangay aron malimpyuhan ang iyang pangalan sa samang pasangil uban ni Gabuya.

Apan ang mga pangangkon sa duha wala tuuhi sa korte gumikan kay positibo silang giila sa biktima ug nakapalig-on pa sa kaso mao ang ubang ebidensyang narekober diha sa ilang posesyon.