Materyalis sa proyekto sa barangay gibaligya

Girekomendar sa City Attorney's Office ang subsub nga imbestigasyon nga himoon sa konseho sa dakbayan sa Sugbo batuk sa barangay kapitan sa Duljo Fatima Miguel "Mike" Cabatino og sa gitudlo niining barangay project coordinator nga si Gerardo Illustrisimo.

Kini human nakita ni Acting City Attorney Rodulfo Golez nga dunay igong basihanan nga ipa-ubos sa imbestigasyon ang kapitan ug ang gitudlong project coordinator niini kabahin sa pasangil nga pagmaniobra og pagpamaligya sa mga materyalis sa barangay alang unta sa self help project sa mga sitio sa nahisgutang barangay.

Ang mga sakop sa konseho sa barangay maoy niduso niining maong reklamo ngadto sa buhatan ni mayor Tomas Osmeña nga giduso usab ngadto sa City Attorneys Office.

Ang mga kagawad nga namirma sa ilang reklamo batok sa kapitan og sa project coordinator niini gilangkoban nila ni kagawad Elmer Abella, Lorenzo Abellanosa, Jesus Alicaya, Jane Cabaral, Jenkin Cabanit og Rodulfo Manlunas.

Gipasabot ni Golez nga walay katungod ang iyang buhatan nga mo-imbestigar sa mga elected officials sa barangay hinungdan nga gitugyan niini ngadto sa konseho ang paghimo og pakisusi.

Subay sa reklamo nga giduso sa mga konsehal sa maong barangay walay bisan usa nga nakita nga gidapatan sa mga materyalis nga gihatag sa siyudad sama sa semento og uban pa alang sa self help project sa maong barangay.

Ilahang gipasangil nga gawas nga wala maabot ngadto sa mga konstituwenti ang maong mga proyekto gipamaligya usab ang ubang mga semento niini sa project coordinator.

Gumikan niini ilahang gireklamo ang kapitan og ang project coordinator aron pagtino sa mga kalapasan niining gihimo diin wala nila pahibaw-a ang mga sakop sa konseho nga gi-release diay ang maong proyekto sa City hall niadtong 2004 apan walay nakita bisan gamay nga proyekto diha sa ilang barangay.