Bighorn gisungag sa bus, milahos sa dagat

Engkuwentro sa de pasaheruang bus ug usa ka pribadong sakyanan miresulta sa paglahos sa usa niini ngadto sa dagat diha sa National Highway sa barangay Bonbon lungsod sa Oslob niadtong milabay'ng Sabado sa buntag nga miresulta sa pagkaangol sa upat ka bata ug tulo ka hamtong nga magkabanay.

Ang milandig sa tambalanan gumikan sa mga ginagmay'ng pangos ug bun-og giilang sila si Aracille Ballesteros, 39, Marlon Rusiana,41, Joseph Villahermosa,18, Janine Villahermosa,15, Jillian Villahermosa,14, Eunice Ballesteros, 12, ug Angelo Ballesteros,usa usab ka minor de edad pulos mga molupyo sa dalan Sepulveda dakbayan sa Sugbo.

Ang mga biktima luwan sa usa ka Isuzu Bighorn Intercooler nga kolor itom nga may plakang YCG-589 nga gimaneho ni Edmund Ballesteros, 39 kinsa padulong unta sa barangay Bato, Samboan dihang gisungag ang Sunrays Bus nga gipanag-iya sa Jerel Transport Corporation nga gimaneho ni Martiniano Lobo Catulinan,48, molupyo sa dalan Avocado, barangay Mambaling ning dakbayan sa Sugbu.

Sumala pa sa imbestigasyon ni PO3 Winston Peneranda sa Oslob police station sa pakighinabi sa Banat News nga ang bus padulong na sa dakbayan sa Sugbu dihang pag-abot sa nahisgutang lugar kalit nga gikadasmag ang sakyanan sa mga biktima.

Matud pa ni Ballesteros sa imbestigasyon nga gisuwayan niya og likay ang bus apan kun himuon niya kini mosampak sila sa seawall hinungdan nga naigo sila sa bus.

Gumikan sa kadako sa bus dyutay ray nahimong danyos niini sa walang bahin sa kilid niini apan ang gisakyan sa mga biktima maoy nagrabehan og kadaut ug nalahos pa ngadto sa pito ka tiil nga gihabugon pangadto sa dagat nga nakaingon sa pagkaangol sa mga biktima.

Human sa insidente daling gidala ang mga biktima sa Oslob district hospital ug gibalhin sa usa ka tambalanan dinhi sa Sugbu samtang ang drayber sa bus malinawong mitahan sa iyang kaugalingon ngadto sa kapolisan.