Money Transfer gitulis

Nag-inusarang tulisan mitulis sa usa ka estabilisamento diha sa dalan Pelaez kagahapon sa hapon ug gisakiyo ang wala pa matinong kantidad gikan sa nag-inusarang kahera.

Ang customer service sa 2GO forwarder & money transfer nga si Leah Toreteo sa pakighinabi sa Banat News mibutyag nga misulod ang lalaki ug dunay gihigot diha sa pultahan dayong duol kaniya.

Apan human niya pangatahuri og "good afternoon sir," "tulis ni!" maoy gitubag niini kaniya dungan sa pagtion og wala matinong kalibre sa armas.

Sa karatol niini walay nahimo si Toreteo dihang gikuha sa suspek ang wala matinong kantidad sa kwarta dayong ikyas.

Si Chief Inspector Ambrosio Ibones mitug-an sa Banat News nga ang suspek gihulagway ni Toreteo nga taason, nagtaptap sa nawong,nagkawo, nagsuot og shades ug nasuot og sweatshirt ug bugason ang nawong niini ug migamit og panapton nga gitabon sa armas.

Sumala pa nga gipahapa si Toreteo sa suspek dayong ikyas sugat sa trapiko sa dalan Pelaez, nagtuo si Ibones nga mikabyon sa mga sakyanan ang suspek ug mibalhin usab og laing sakyanan sa pag-ikyas.

Matud pa ni Ibones nga posibleng taga diha ra ang tulisan gumikan kay nagtabon kini halos sa tibuok niyang nawong.

Gikatahong dunay duha pa ka mga kauban si Toreteo nianang hitaboa apan ang usa dunay gilakaw kay dunay gipaayong computer samtang ang usa miadto sa kasilyas dihang kalit nga misulod ang suspek.

Nasayran gikan sa gwardiyang si Eliseo Villamor nga dunay 15 ka gwardiya nga nagbantay diha sa tibuok edipisyo diin mahimutang ang Colonade ug mga sinehan ug uban pang mga estabilisamento apan niadtong tungura duha ra gyud ang roving niadto.

Sumala pa ni Villamor nga kasamtangan siyang nikaon niadtong tungura ug ang kaubang si Lolita Tobis ray nag-roving apan giatol usab sa tulisan nga wala diha ang mga gwardiya.

Ning pagsulat sa balita wala pa matino gikan sa kapolisan kun pila maoy nadagit sa tulisan sanglit nalisang pa si Toreteo.