Industriya sa asukar lig-on

Samtang naguol ang mga pumapalit sa kataas sa presyo sa asukar, kalipay ang gibati niini sa mga negosyante og kamay kay alang kanila timailhan kini sa kalig-on na karon sa industriya sa asukar.

Matud pa ni Jose Mari Miranda, presidente sa Bogo-Medellin Sugar Planters Association (BMSPA) mibukal karon ang ilang paglaom nga ang industriya sa asukar molahutay sa dugang pang katuigan.

Alang kang Miranda, may mga panahon nga nag-aginod ang industriya diin hapit na sila kahubsi og paglaum gumikan sa kahinay sa ilang produkto.

Gumikan sa kahinay niini mibarato pa gyud ang presyo sa asukar nga nakapasubo kanilang mga negosyante samtang nakapalipay usab sa mga pumapalit.

Apan miingon si Miranda nga dili mabasol sa katawhan ang mga negosyanteg asukar dinhi sa nasud sanglit igo lamang kining miduyog sa kamahal sa presyo sa asukar sa merkado sa kalibotan.

Usa sa labing dako og konsumo ning maong produkto mao ang Estados Unidos nga mao usab ang tigdawat sa mga asukar gikan sa labing dakong suplayer nila nga mao ang nasud sa Brazil.

Matud pa ni Miranda nga ang pagbalhin sa Brazil gikan sa pagprodukto og asukar sa ilang tubo ngadto na sa pagprodukto og ethanol maoy nakapakunhod og 50 porsiyento kon katunga sa ilang suplay nga asukar ngadto sa US.

Matud pa ni Miranda nga dinhi modako ang ilang paglaom nga magpadayon na ang pagsaka sa presyo sa asukar nga maoy gipaabot sa mga trabahante sa tubo, gikan sa mag-uuma ug hangtod sa mga negosyante.