Gidagit, gipasayaw nga naghubo

Gidagit ug gipasayaw nga naghubo. Mao kini ang nahitabo kang Marina (dili niya tinuod nga pangan), 17 anyos ug lumolupyo sa usa ka bukiran nga barangay sa dakbayan sa Toledo.

Si Marina, suma pa sa tinubdan ning balita, nananggi og mais dihang naagian kini sa tulo ka lalaki nga nang-hunting og langgam.

Suma pa sa istorya ni Marina ngadto sa iyang mga kabanay, giagda siya'g painit sa tulo ka lalaki.

"Ambot nganong niuban man ko nila uy," matud pa ni Marina. "Tingali tungod kay gigutom ko atong tungora."

Nangaon sila sa bawon sa tulo ka lalaki, nga suma pa ni Marina mga anak tingali sa datu kay mahalon ang ilang cellphone ug relo de pulso.

Apan wa dangtig dugay, gipahubo siya sa mga lalaki kinsa mihulga nga pusilon siya kun di mosugot.

"Silang tulo pulos dunay tag-as nga pusil," suma pa sa dalaga. "(Mga air rifles tingali kadto. -- Editor).

"Napugos ko'g hubo ug nagkurog-kurog nga nagpaabot nga ila kong lugoson kay nganong ila man kong gipahubo?" si Marina nagkanayon ngadto sa iyang inahan.

"Apan wa ko nila lugosa, kaluoy sa Diyos. Ila ra kong gipasayaw-sayaw sa ilang atubangan ug wa gani ko nila hikapa."

Ang inahan ni Marina naglisud sa pagtuo sa iyang istorya nga wa siya hilabti busa iya kining gidala sa Don Vicente Sotto Memorial Hospital aron ipatan-aw sa doktor kun wa ba gyud kahilabti ang ilang anak.

Negative ang result sa eksaminasyon, suma pa sa tinubdan ning balita.