Way disiplina ang hinungdan sa stampede sa Wowowee

Wala'y disiplina ang mga tawo nga gustong mosalmot sa usa ka television show nga Wowowee sa ABS-CBN nga hinungdan sa trahedya sa Ultra sa Pasig.

Kini ang gipadayag ni Robert Go, ang presidenti sa Cebu Chamber of Commerce and Industry isip reaksiyon sa pasangil nga ang kapakyas sa gobyerno sa pagtubag sa kakabus sa katawhang Pilipinhon ang hinungdan nga nahitabo ang trahedya.

Si Go kinsa usa sa mga sakop sa economic team sa administrasyon ni Presidenti Gloria Macapagal Arroyo nagkanayun nga ang ka wala'y disiplina sa mga Pilipino ang angayang mabasol sa maong trahedya hinungdan sa kapin sa 70 ka kinabuhi ang nakalas.

"The basic problem during the Ultra stampede was the lack of discipline in queuing and that each must learn to respect the first-come first-serve basis policy. Due to too much excitement, most wanted to be on the line first even if it meant physically pushing bodies around and hurting people in the process," nagkanayun si Go.

Ang mga tigsaway sa gobyerno mitumbok sa kapakyas sa pagtubag sa kakabus sa katawhan nga nahitabo ang trahedya.

Gani gisanglitanan ni Go ang nahitabo usab sa football games sa Uropa ug sa daghan nang susamang trahedya sa Saudi Arabia.

Wala usab nagtoo si Go nga ang tanang nanambong sa maong kalingawan sa Ultra pulos mga kabus.

Dugang pa ni Go nga human sa maong insidenti, panahon na nga makat-on ang mga Pilipino og disiplina sa susamang kalihukan diin maghuot ang mga tawo sa paglinya ug wagtangon na ang kinaiya nga mag-unahay sa linya.