Drayber gidul-ita'g pusil

Patay ang usa ka PUJ driver human kini dul-iti og pusil sa duha ka wala mailhing mga lalaking luwan sa usa ka motorsiklo diha sa utlanan sa barangay Media Once ug Bolongan sa dakbayan sa Toledo niadtong milabay'ng Miyerkules sa hapon.

Ang biktima giilang si Claudio Billones, 30 anyos, molupyo sa barangay Poog dakbayan sa Toledo gipusil makausa diha sa walang tampihak sa ulo sa duha ka wala mailhing tawo.

Matud pa ni PO1 Sidney Deada sa Toledo Police sa pakighinabi sa Banat News ang biktima namasahero gikan sa Toledo City padulong sa barangay DAS niadtong tungura.

Giingong pag-abot sa maong lugar gihunong ni Billones ang iyang sakyanan sanglit dunay pasaherong mikanaog dihang kalit nga gituparan sa usa ka Yamaha STX nga walay plaka ug ang backrider niini maoy midul-it og pusil sa tampihak niini.

Si SPO3 Basiliso Balicuco sa pakighinabi sa Banat News mibutyag nga ilang gisubay karon ang anggulo sa panagbangi sa mga unyon diha sa Atlas Consolidated Mining Corporation.

Giingong anak ni Marcos Billones ang biktima, si Marcos maoy usa sa mga gisuspetsahan nga may kalambigitan sa pagbanhig sa laing lider sa unyon sa Atlas nga si Tony Cuizon niadtong milabay'ng tuig diha sa barangay Lutopan sa samang dakbayan, si Cuizon nakaangkon ug mga samad pinusilan diha sa kalawasan niadtong tungura apan nasalbar.