Balay sa Hapones gilungkab sa Mandaue

Duha ka mga lawak sa apartment nga ang usa niini gipuy-an sa Japanese national gilungkab sa wala mailhing mga sakop sa akyat bahay gang ug gisakiyo ang mga mahalon niining butang.

Ang pagpanglungkab gituohang nahitabo sa miaging gabii ug nadiskubrehan kini alas 6 na pasado ang takna sa buntag sa sunod adlaw.

Si Evangeline Oda, hingkod ang panuigon nga nagpuyo sa Ronquillo Apartment sa Banilad, siyudad sa Mandaue ug asawa sa usa ka Japanese national maoy misumbong sa kapolisan sa Presinto 2 sa Subangdaku, siyudad sa Mandaue.

Ang laing biktima nga kauban ni Oda mitaho sa maong kuwerpo mao si Loresita Orita, hingkod ang panuigon ug nagpuyo sa sikbit nga lawak sa nahisgotang apartment.

Sumala pa ni Oda nga nahanaw gyod ang iyang Sony component nga P35,000 ang kantidad ug mahalon usab nga cellphone nga 4610 ang gisakiyo sa laing biktima.

Si PO2 Dindo Monteclaros sa kapolisan sa maong presinto ang mipasabot nga gipangtangtang ang mga puthaw nga birha sa mga bintana ug gikuot ang kandado niini.

Sumala pa ni PO2 Monteclaros nga higpit kaayo karon nilang gisusi ang maong pagpangawat sa maong dakbayan sanglit namatikdan man ang mga kadaut sa bintana sa gipuy-an sa mga biktima.