Kuwestiyon ni Tomas sa Talisay dili mosaler

Dili mosaler ang panlimbasog ni Mayor Tomas Osmeña sa pagkwestiyon sa pagkasiyudad sa Talisay karong gipatin-aw na sa buhatan sa Solicitor Geneal nga dili importante ang populasyon, kundili "income" maoy mahinungdanon alang sa usa ka lungsod nga himoong siyudad.

Matud pa ni Kongresista Eduardo Gullas sa unang distrito sa lalawigan, nga basi sa 32 ka pahina nga pamahayag o komentaryo ni Solicitor General Alfredo Benipayo sa pagkuwestiyon ni Osmeña sa legalidad sa Talisay cityhood, ang lokal nga kodigo sa kagamhanan mipiho nga basta ang aplikante sa pagkadakbayan makapasar sa "income requirements", igo na kana.

Miingon si Gullas nga tungod kay ang gipangita ni Osmeña mao man ang populasyon sa Talisay, hungaw kaayo ang iyang petisyon.

Apan bahin sa populasyon, gitubag gihapon kini ni Gullas nga basi sa rekord sa National Statistics Office (NSO), nagtubo ang Talisay sa populasyon nga 20,000 matag lima ka tuig basi sa survey tali sa 1995 hangtod sa 2000.

Busa alang kaniya nga kon naaprobahan sa Kongreso ang charter sa Talisay City niadtong Nobiyembre 22, 2000, gibanabana nga nianang higayona mikabat na sa 151,000 kapin ang populasyon niini ug milapas na sa gikinahanglang 150,000.

Sa bahin ni Benipayo, kini nagkanayon nga matag balaod sa nasud gitun-an kini pag-ayo sa mga magbabalaod una aprobahi.

Kun may tawo mang mo-kuwestiyon niini, kinahanglang ipakita niya ang lig-ong mga ebidensya aron mosaler ang iyang reklamo.