Usbaw sa suholan posible tungod sa RVAT

Posible nga dunay usbaw sa suholan sa mga mamumuo karong tuiga, kun mapamatuod nga adunay negatibong epekto ang Reformed Value Added Tax.

Si Secretary Patricia Sto. Tomas mihimo sa maong pamahayag apan wala kini kasigurohan tungod kay sayo pa ang pagsuta sa epekto sa bag-o lang nga gi-implementar nga buhis.

Ang 12 percent RVAT gipatuman karon lang buwan sa Pebrero.

Si acting DOLE regional director Elias Cayanong nagkanayon nga sa pagkakaron wala pay nadawat nga petisyon ang ilang buhatan nga naghangyo og dugang usbaw sa suhulan.

Matud ni Cayanong nga angay pang buhatan og pagtuon sa DOLE ug sa National Wages and Productivity Commission kun aduna bay di maayong epekto ang RVAT labina ngadto sa mga minimum wage earners.

Sa miaging tuig mipasar og P15 nga umento sa suhulan sa mga mamumuo dire sa Central Visayas, tungod sa nasuta nga epekto sa Expanded Value Added Tax (E-VAT).

Ang mga grupo sa mamumuo mihulagway nga yaga-yaga ang gihatag nga kantidad sa umento tungod kay ang makiangayong usbaw modagan og P115 ngadto sa P130.

Base sa mga detalye gikan sa National Economic and Development Administration gikinahanglan nga ang minimum nga suhulan sa usa ka pamilya nga dunay unom nga miyembro mokabat og P641.

Ang minimum nga suweldo karon P223.