Namutol og wire gipusil sa sikyu

Patay ang usa ka electrician nga gipasanginlang nangawat og mga pinutol nga wire human kini gi-shotgun sa guwardiya sa ilang gitrabahuang construction site diha sa Costabella Tropical Beach Hotel sa barangay Maribago dakbayan sa Lapu-Lapu niadtong Lunes sa hapon.

Usa ka bala sa shotgun ang hinungdan sa kamatayon sa biktimang si Sergio Buot Laping Jr. hingkod ang panuigon ug molupyo sa barangay Luyang lungsod sa Carmen ug konektado sa JKLM Construction.

Samtang malinawong mitahan sa kaugalingon ang suspek nga si Jonathan Babatuan, 29, sakop sa Archangel Security and Investigative Agency nga nagbantay sa Dakay Construction Development Corp, lumad nga taga Catarman, Cordova.

Sumala pa sa imbestigasyon nila ni PO3 Manolito Abellanosa ug PO3 Ritchie Aballe sa Homicide Section ang biktima sa sayo pa gisitar sa suspek gumikan sa nakit-ang linukot nga mga wire diha sa bulsa niini nga gituohang gikawat sa biktima diha sa site.

Apan nianang pagkahapon nagkabingkil na usab ang suspek ug biktima nga misangpot sa mainitong panaglalis, ning tungura gipusil sa suspek makausa sa dughan si Laping.

Patay kini diha-diha samtang malinawong mitahan sa kapolisan si Babatuan ug gi-turn-over ang iyang Armscor shotgun nga maoy gigamit sa pagpusil sa biktima, nakuha usab ang usa ka basiyo sa bala niini.