Sanitary inspector nga 'drug positive' mi-resign na lang

Wala na sa serbisyo ang sanitary inspector sa City Health Department sa Cebu City Hall nga nadiskubrehan nga positibo sa gipahigayong kinalit nga pagpang-drugtest sa Cebu City Office for Substance Abuse Prevention (COSAP) niadtong Sabado.

Atol sa press conference kagahapon sa udto opisyal nga gipahibalo ni Mayor Tomas Osmeña nga dili na nila kinahanglan pang taktakon ang maong kawani nga nagbinugtong nga positibo sa milabay'ng pagpang-drugtest gumikan kay boluntaryo naman kining mi-resign sa katungdanan.

Wala ibutyag sa mayor ang ngalan sa maong sanitary inspector nga nakahukom nga mo-resign sa serbisyo human migawas nga positibo sa milabay'ng pagpang drug test.

Ang hepe sa Environmental Division sa Cebu City Health Office, Dr. Reynette Christine Ligaray, maoy mipatawag og meeting sa tanan niyang mga sakop niadtong Sabado nga miresulta sa pagpang-drug test.

Si Ligaray maoy mihangyo sa buhatan ni Konsehal Augutus Pe Jr. tsirman sa committee on dangerous drugs aron ipahigayon ang kinalit nga pagpang-drug test human kini nakadawat og report nga dunay duha sa mga sanitary inspector niini ang tiggamitan og gidiling drugas.

Ang kinalit nga pagpang-drugtest subling gilusad sa mga opisyal sa dakbayan ngadto sa tanang mga kawani sa siyudad sa Sugbo karung tuiga aron malimpyohan ang balay lungsod gikan sa mga empleyado nga tiggamitan og gidiling drugas.

Gibasi usab kini sa balaod nga nagtugot sa mga lokal nga kagamhanan pagpahigayon og random drug testing ngadto sa mga kawani sa buhatan sa gobyerno matag tuig.