Sumabong misurender

Ang "whistle blower" sa Land Bank Bogo robbery nga si Joel Sumabong mitahan na sa kapolisan kagahapon human sa pagtago-tago gikan sa kapolisan human sa nahitabong pagpanulis sa maong bangko sa milabay'ng tuig.

Si Sumabong unang mipasangil sa kalambigitan ni Bogo Mayor Celestino 'Tining' Martinez sa maong tulis ug nangangkon nga napugos siya sa pagtahan sa kapolisan gumikan sa nadawat niyang impormasyon nga dunay gibutang nga patong nga P1 milyon sa iyang ulo sa si bisan kinsang makapatay kaniya.

Si Chief Inspector Juanito Enguera ang hepe sa Provincial Investigation and Intelligence Branch sa Provincial Police mitug-an sa Banat News nga nausab ang orihinal nga dapit sa pagtahan ni Sumabong gumikan kay dunay nasigpatang mga wala mailhing tawo didto sa lugar nianang Domingo sa gabii diha sa Mid-North.

Matud pa ni Enguera ang guide nilang si Dindo Ancero kinsa usa sa mga suspek sa pagtulis sa Bogo pinaagi sa text gipahibalo ni Sumabong nga mibalhin kini og gitaguan niadtong gabhiuna diha sa barangay Agsungot ning dakbayan sa Sugbu hinungdan nga pag-abot diha palang sa Liloan mibalik sa agi ang kapolisan ug midiretso sa Agsungot.

Si Ancero suot ang usa ka itom nga long sleeve nga sweat shirt, nag-antyuhos, nagkawo ug nagbulibod og tubaw giposasan sa kapolisan pabalik sa CPPO diin himuon ang affidavit niini kabahin sa mga pasangil.

Sumala pa ni Enguera ilang amendahan ang complaint batok sa maong pagpanulis sanglit idugang na sila si SPO2 Mario Cuerda ug Boy Tagalog, samtang gisusi na usab ang kalambigitan sa usa ka Digoy Mayol.

Gikatakdang anha ibalhog sa Cebu Provincial Rehabilitation and Detention Center si Sumabong human mapresentar ngadto sa Korte sa Branch 61 sa Bogo gumikan sa peligro sa seguridad niini.