Cuenco naigo sa fertilizer anomaly

Giangkon ni Kongresista Antonio Cuenco nga na-apektuhan gyud siya niining paglambigit sa iyang pangalan sa kontrobersiya sa misteryosong pagkahanaw sa pundo sa P728 milyones nga fertilizer fund nga gi-release sa Department of Agriculture (DA) niadtong naghinangat ang 2004 presidential election ug gidudahang gigamit sa kampanya ni Presidente Gloria Arroyo.

Atol sa press conference niadtong Sabado gibutyag ni Cuenco nga nakahatag og babag ang maong kontrobersiya ilabi na ang paglambigit sa iyang pangalan sa iyahang pag-asikaso sa mga nakahan-ay nga gimbuhaton.

Hugtanong gihimakak sa kongresista nga wala gyud siyay gidawat nga komisyon sa P3 milyones pesos nga pundo sa fertilizer fund nga gipamalit og mga liquid fertilizer nga gi-apod apod sa lima ka mga bukirang barangay sa iyang distrito.

Kini tungod kay wala siyay kasayuran ning maong proyekto og gani walay iyang mga staff ang mitambong sa gipahigayong pag-apod-apod sa maong liquid fertilizer ngadto sa mga barangay sa Pamutan, Sudlon Uno ug Dos, Toong ug Tabunan.

Gibutyag usab sa kongresista nga giangkon ni DA-7 Regional Director Eduardo Lecciones nga nasayop siya sa paglambigit sa pangalan sa kongresista.

Aron mahunong na ang maong isyu ug aron makapadayon na siya sa iyang mga gimbuhaton diha sa iyang distrito gitinguha karon ni Cuenco nga manginlabot ang Ombudsman og ubang ahensya sa gobyerno paghimo og lina-ing imbestigasyon ning maong kontrobersya.

Nasayran nga padayon karung gipangita sa senado si kanhi Agriculture undersecretary Jocelyn "Jok-Jok" Bolante nga maoy giingong responsable sa pagpagawas sa maong pundo aron mo-atubang sa Senate inquiry tungod kay gawas nga gi-over-price ilegal usab ang pag-release niini gumikan sa nagsingabot nga piniliay niadtong higayona.