Ang kamatayon sa misyonerong si Antonio Lee, 53 anyos, lumad nga taga Tagolon Misamis Occidental nakapalibog sa mga imbestigador sa Homicide Section sa dakbayan sa Lapu-Lapu.
Sa imbestigasyon ni SPO2 Rolito Jumao-as migawas nga luwan si Lee sa usa ka traysikol nga gimaneho ni Paulino Macau Jr. padulong sa lungsod sa Cordova dihang pag-abot sa may dalan Osmeña sa nahisgutang dakbayan kalit lang kining nagping-it sa kasakit sa iyang tiyan.
Sumala pa nga imbes nga sa Cordova nagpahatud ang biktima sa Lapu-Lapu District Hospital, apan pag-abot didto gideklarar kining patay na dihang nadangat sa maong tambalanan.
Dihang gisusi sa mga imbestigador walay nakitang foul play sa lawas sa biktima hinungdan nga girekomendar sa Homicide Section nga ipa-awtopsiya ang lawas ni Lee.
Samtang sayo pa niadtong Sabado, diha sa barangay Agus sa samang dakbayan usa ka Manuel Hermosa, 46, minyo kinsa usa ka panday ang napalgang patay sa iyang asawa.
Mitumaw sa imbestigasyon pinanguluhan ni Inspector Rene Catamora sa Homicide Section base sa gibutyag sa asawa sa biktima nga niadtong Biyernes sa gabii nananghid ang biktima kaniya nga magduwa og bingo sa gawas, apan dihang naabot kini pila ka oras ang milabayng nagmulo na kini sa kasakit sa iyang tiyan.
Nakatulog nalang ang biktima sa kasakit sa tiyan niini, apan pagka-kaadlawon namatikdan sa asawa nga wala na maglihok ug magginhawa ang iyang bana maong dali niyang gipahibalo sa kapolisan.
Ang kapolisan mirekomendar usab og awtopsiya sa patayng lawas sa biktima gumikan kay walay nakitang foul play sa patayng lawas niini.