Subasta sa CICC sugdan sa Feb. 23

Gikatakda ang pagsubasta sa pagaugmaron nga Cebu International Convention Center (CICC) nga pagasalmutan sa napulo ka mga kontraktor karong Pebrero 23 niining tuiga.

Si Capitol Consultant Apollo Enriquez mipadayag ngadto sa mga tigbalita nga ang Hillmarc Construction Corporation maoy kontraktor nga katapusan gayod nilang gihatagan og kahigayonan nga makasalmot sa bidding nga pagahimoon.

Nakaapas kini sa pagsumitir sa mga dokumento ug uban pa nga mga rekisito nga mokuwalipay sa pagpatrabaho sa phase 1 sa CICC uban sa laing siyam pa ka mga kontraktor niini.

Si Apollo miingon nga dugang pa unta laing tulo ka kontraktor nga mihangyo nga moapil sa bidding apan ilang gisalikway sanglit sulat man ang gipadala ug walay representante nga nagsumetir og mga dokumento.

Dugang pa ni Apollo nga sa Marso ang gikatakdang pagsugod sa pagtrabaho ug gipaabot usab nga mahuman sa Nobiyembre niining tuiga.

Gipasabot usab ni Apollo nga ang orihinal nga desinyo ni Architect Alexus Medalle maoy tumanon apan may madugang lamang nga mao ang convention center alang sa Association of Southeast Asian Nation Summit karong Disyembre nga tambongan sa 17 ka pamuno nasud.