'Jovan akong gilayog' – Soc

Nagpakitabang si Mayor Socrates Fernandez sa Ginoo aron mapas-an pa niya ang krus kalabot sa problema sa iyang anak nga si Joy Fernandez.

Kini samtang gipanghimakak niya ang mga pasangil nga giunay niya pagkulata si Jovan niadtong Biyernes sa hapon.

Giangkon ni Fernandez nga isip amahan, gilayog niya si Jovan apan wa niya kini dapati.

Midugang ang mayor nga gumikan sa paglinugnot niini, iyang gipaposasan sa kapolisan.

Si Jovan giingong nagkaaway ug ang iyang live-in partner nga si Soraida Paculaba, 30, taga San Isidro, Talisay City.

Base sa blotter sa kapolisan, si Paculaba misumbong nga matud pa gihulga siya ni Jovan.

Sa bahin ni Fernandez, maglisod siya pagpiog sa taras ni Jovan ug giisip niya kining bug-at nga krus nga iyang gipas-an.

Ang mayor nga Diosnon kaayo, walay laing gisampit gawas sa Ginoo aron katabangan siya pagsulbad ning maong problema.

Matud pa sa mayor nga sa kadaghan nang mga isyu nga nalambigit si Jovan diha sa Talisay, naglaraw siya nga iya kining ipasulod sa rehabilitation center.

Apan padayon pa niya kining gipanid-an karon kay usahay maayo man ang dagan sa hunahuna ug kinaiya niini.