Tulisan gipusil kay misibat

Usa ka 17 anyos kinsa gipasanginlang midunggab sa drayber sa gitulis niining taxi ang napusilan sa usa ka sakop sa Regional Mobile Group nga nadestino diha sa Maritime Police sa Pier 5 ning dakbayan niadtong nakalabay'ng gabii.

Ang biktima nga si Ace (apelyedo gipugngan) 17 anyos, molupyo sa barangay Tabunok dakbayan sa Talisay nakaangkon og kadaut sa bukog sa iyang walang bitiis human kini mapusili ni PO1 Rey Reponsa.

Sumala pa sa imbestigasyon sa kapolisan ang suspek misakay sa taxi sa biktima dili layo sa Pier 5 dihang wala pa kini magdugay sa gilingkuran kalit nga mideklarar og tulis sa drayber nga si Aldwin Limbaga, 36, taga dalan C.Padilla ning dakbayan.

Apan dihang nagmagahi ang biktima kalit nga gidunggab sa suspek og gunting ang ulo niini hinungdan sa pagkasamad niini ug paglayat agi sa bintana sa iyang awto dayong dagan sa outpost sa Maritime Police.

Ang suspek diha na naabting naglakaw sa maong pantalan ug dihang gisita giingong mihana kini og dunggab kang Reponsa hinungdan nga gipusil siya niini diha sa bitiis, ang suspek milandig sa Cebu City Medical Center ug gikatakdang pasakaan og kaso ugmang adlawa.