Si Joel Sumabong kinsa nagtago-tago pila na ka bulan ang nakalabay mipatim-aw na sa telebisyon diha sa usa ka sekretong dapit sa bukirang bahin sa lalawigan atol sa gihimong interbyu sa ABS-CBN Cebu kagahapon.
Subling gipasangil ni Sumabong nga si Mayor Martinez maoy nagsugo kanilang tulison ang maong bangko, gani nangangkon si Sumabong nga siya maoy gitahasang mohimo og surveillance sa maong bangko una pa kini tulisa pinanguluhan sa usa ka Boy Tagalog.
Ang crew sa ABS-CBN newsteam gikuyugan sa usa usab sa mga suspek nga si Dindo Ancero kinsa nakapiyansa human kini madakpi didto sa Masbate pila na ka bulan ang nakalabay alang sa maong interbyu .
Gipakita pa ni Sumabong sa camera sa ABS-CBN ang giingong resibo nga nagpakitang suportado sa mayor sa Bogo ang ilang kalihukan, dugang pa niya nga duna nay 100 ka tawo silang gipamatay subay sa kamandoan sa mayor apan unom ra niini ang natala sa police blotter.
Giangkon usab niya nga gisugo siya kaniadto sa mayor nga ipapatay ang managtiayong sila si Mayor Maria Luisa Loot ug Sr. Supt. Vicente Loot gani nangangkon si Sumabong nga siya pay gipahimo sa mga sketch sa maong mga plano.
Si Sumabong usa na ka semana ang nakalabay mikawhat sa atensyon sa lalawigan dihang mipadala kini og mga kopya sa VCD ngadto sa tanang media outlet diin siya mibutyag sa tanang kahiwian sa mayor sa Bogo.
Apan ang amahan ni Mayor Tining nga si kanhi kongresista Celestino Martinez Jr. sa interbyu sa ABS-CBN kagahapon mihimakak sa nangangkon ni Sumabong ug nagdudang hinimo-himo ra ang mga alegasyon batok sa iyang anak aron kini dauton.
Si Mayor Martinez gikatakdang modagan pagka-kongresista sa umaabot nga 2007 election diha sa ilang distrito, matud pa sa amahang Martinez nga wala gyud siya makaila kang Sumabong ug kun magsugat man ugaling sila sa dalan dili niya kini mailhan.
Midugang ang kanhi kongresista nga 'obvious' ug malisyoso kaayo kun tinuuray man nga sila maoy mopapatay sa managtiayong Loot gumikan kay baniog na kaayo ang kahigpit sa ilang panagribal sa politika sa maong distrito.
Nagduda karon si Martinez nga dunay nagpaluyo sa maong mga pasangil ug gidudahan niya ang mga tawong gipanglitok ni Sumabong diha sa maong interbyu nga mao ray nagmaniobra niini, wala hinuon nganli ni Martinez diha sa interbyu ni Leo Lastimosa kung si kinsa ang iyang gitumbok apan dayag kaayong ang magtiayong Loot ray gipanglitok ni Sumabong niadtong tungura.
Dihang gipangutana ni Lastimosa ang kanhi kongresista kung nakaapekto ba kini og dako kanila ang kongresista mitubag nga "It does not warrant any attention from us."
Si Sumabong gikatakdang motahan sa kaugalingon karong Lunes, matud pa niya nga nagtago-tago siya gumikan sa nadawat nga impormasyon nga ipahipos siya aron mahilom ang tanan.