Tomas nagmagahi, mga kompaniya pabayron gyug tax

Gukdon sa kagamhanan sa siyudad sa Sugbo ang mga kompaniya nga nagbase dinhi sa dakbayan nga naglikaylikay sa ilang obligasyon nga bayranang buhis.

Pabiling gibarugan ni Mayor Tomas Osmeña nga obligadong mobayad og buhis dinhi sa dakbayan ang mga negosyante nga nagtukod og mga patigayon dinhi sa Sugbo gumikan kay nakapahimulos gihapon kini sa mga gipaangay nga serbisyo sa siyudad.

Atol sa press conference sa miaging udto gibutyag sa mayor nga himuon nila ang kutob sa ilang mahimo makabayad lang sa obligasyon buhis ang mga kompaniya nga ania magbase dinhi sa dakbayan. Usa sa gitumbok sa mayor ang usa ka kompaniya nga nga miinsister nanggama og tambal nga dili na sila obligadong mobayad og sales tax dinhi sa dakbayan gumikan kay nagbayad na sila og siyento porsyento niini sa mga kalungsoran ug dakbayan diin nahimutang ang ilang mga sangang buhatan.

Apan alang kang Osmeña gikinahanglan nga 70 porsiyento ang bayran niini sa sales tax dinhi sa siyudad gumikan kay ania dinhi magbase ang ilang manufacturing sa produkto og 30 porsyento lang ang sales tax nga bayran sa ilang mga sangang buhatan sa lugar nga nahimutangan niini.

Hinuon motugot ang mayor nga dili na lang kolektahan ang maong bayranang buhis kun makapresentar ang maong kompaniya og kamatuoran nga tinuoray kining nagbayad og siyento porsyento sa sales tax sa mga lugar diin nahimutang ang ilang mga sangang buhatan.